दमकलको पानी सकिँदा २५ कोठे घर खरानी


आगो अन्यत्र सर्न नदिन डोजर लगाएर घर भत्काइयो, आठ घन्टा लगाएर आगो नियन्त्रण

घरमा आगलागी हुनेबित्तिकै आइतबार बिहान चन्दननाथ नगरपालिका–२ कालेखोलीका विष्णु भण्डारीले दमकल र सुरक्षाकर्मीलाई खबर गरे । तत्कालै दमकल र सुरक्षाकर्मी त पुगे तर घर जोगिएन । बरु अन्य घर जोगाउन उनको घर डोजरले भत्कायो ।

आइतबार बिहान १० बजेतिर विष्णुको घरमा आगलागी सुरु भएको थियो । पाँच मिनेटभित्रै नगरपालिकाको दकमल र सुरक्षाकर्मी पुगेको उनले बताए । ‘भर्खर लागेको आगो दमकलले निभाउँछ, धेरै क्षति हुँदैन भनेर ढुक्क भएको थिएँ । तर, दमकलले आगो नियन्त्रण गर्न थालेको केहीबेरमै पानी सकियो,’ विष्णुले भने ।
त्यसपछि भने आगोले झन् ठूलो रूप लियो । दमकल पानी भर्न दगु¥यो, विष्णुका परिवारजन बेहोस भए । ‘परिवारजन होसमा आउँदा त घर खरानी भइसकेको थियो,’ उनले सुनाए ।

हुन पनि पानी लिन गएको दमकल फर्किन एक घन्टा लाग्यो । स्थानीय बासिन्दा, सुरक्षाकर्मीले सहयोग गर्दागर्दै २५ कोठे घर खरानी भयो । दमकलले पाँचपटक ओहोरदोहोर गर्दा आगो नियन्त्रणभन्दा पनि झन्झन् बढ्दै गएको स्थानीय बासिन्दाले बताए । ‘विपद् व्यवस्थापनका सयंन्त्रहरू पूर्वतयारी अवस्थामा नराख्दा ठूलो क्षति भयो,’ स्थानीय गौरीनन्द आर्चायले भने, ‘दमकललाई पानी ओसार्दै ठिक्क भयो, आगो निभाउनेभन्दा पानी सार्दै समय बित्यो । दनदनी बलेको आगोले हेर्दाहेर्दै घर खरानी बनायो ।’

बिहान १० बजे लागेको आगो साँझ ५ बजे नियन्त्रणमा आएको प्रमुख जिल्ला अधिकारी दुर्गा बन्जाडेले बताइन् । ‘अन्य घरमा आगो सर्न नदिन डोजरले घर नै भत्काउनुप¥यो,’ प्रजिअ बन्जाडेले भनिन् । त्यो घर जोगाउन नसके पनि अन्य घर जोगिएको उनले बताइन् ।

आगलागीबाट करोडौँको क्षति भएको विष्णुले बताए । उनका अनुसार, घरको १६ कोठा भाडामा थिए । त्यहाँ बस्ने विद्यार्थीका पनि सबै सरसामान जलेर नष्ट भएको उनले बताए । ‘केही बाँकी रहेन । शरीरमा लगाएको लुगाबाहेक केही छैन,’ उनले भने । आठ घन्टा लगाएर आगो निन्त्रणमा आएको जिल्ला प्रहरी कार्यालयका डिएसपी लालबहादुर धामीले बताए । धनमालको क्षति रोक्न नसके पनि छेउमै रहेको घर जोगाउन आगलागी भएको घर डोजरले भत्काउनुपरेको उनले बताए । विद्युत् तार सर्ट वा ग्यास सिलिन्डर लिक हुँदा आगलागी भएको हुन सक्ने उनको भनाइ छ ।

दमकल तयारी नराख्दा तीन घर खरानी
दमकलमा पानी भरेर नराख्दा आइतबार विष्णु भण्डारीको घर जलेर खरानी भएको छ । यसअघि पनि दमकल तयारी अवस्थामा नराख्दा दुई घर जलेर नष्ट भएका थिए ।

२३ कात्तिकमा चन्दननाथ नगरपालिका–५ का नवराज श्रेष्ठको घरमा आगलागी भएको थियो । त्यस्तै, १६ भदौमा चन्दननाथ नगरपालिका–१ का जयबहादुर रावतको घरमा आगलागी भएको थियो । दुवै घरमा आगलागी हुनेबित्तिकै दमकललाई खबर गरे पनि निभाउन आएनन् । नवराजको घरमा आगलागी हुँदा ६० लाख ७९ हजार र जयबहादुरको घरमा आगलागी हुँदा ७३ लाखको क्षति भएको थियो । दमकलको बेरिङ बिग्रिएको र चालक नभएकाले नवराज र जयबहादुरको घरमा आगलागी हुँदा दमकल पठाउन नसकिएको मेयर कान्तिका सेजुवालको भनाइ छ ।

तपाईको प्रतिक्रिया