जुम्ला ः कर्णाली राजमार्गमा यातायात व्यवसायीले मनपरी भाडा उठाउने गरेका छन् । स्थानीय प्रशासनले तोकेको भाडादरभन्दा बढी असुल्ने गरे पनि अनुगमन हुने गरेको छैन ।
भाडामा एकरूपता ल्याउने उद्देश्यले स्थानीय प्रशासनको अगुवाइमा भाडादर निर्धारण गरिएको थियो ।
जिल्ला प्रशासन कार्यालय र यातायात व्यवसायी कार्यालय, जुम्लाको पहलमा भएको छलफलमा भाडादर कायम भएको थियो । तर, एक वर्ष बितिसक्दा पनि यातायात व्यवसायीले मनपरी भाडा असुल्न छोडेका छैनन् ।
यातायात व्यवस्था कार्यालयका प्रमुख मित्रलाल ढकालले भाडादर कार्यान्वयनमा नआएको बताए । ‘कर्णाली राजमार्गमा भाडादरमा एकरूपता आएको छैन, व्यवसायीले भाडादर कार्यान्वयनमा ल्याएका छैनन्’ ढकालले भने ।
व्यवसायीद्वारा दोब्बर भाडा असुली
जुम्लाबाट सुर्खेत, नेपालगन्ज र काठमाडौंका लागि यातायातका साधनहरू चल्छन् । सुर्खेत र नेपालगन्जसम्म बसका साथै साना सवारीसाधन जिप, माइक्रोबस पनि चल्ने गरेका छन् ।
यातायात व्यवस्था कार्यालय जुम्लादेखि सुर्खेतसम्म प्रतियात्रु ८ सय १९, नेपालगन्जसम्म १ हजार ६९ र काठमाडौं दुई हजार रुपैयाँ भाडा तय गरिएको छ ।
तर, यातायात व्यवसायीले यात्रुअनुसार भाडा लिने गरेका छन् । जसबाट जतिसक्यो, त्यति लिने गरेको यात्रुको गुनासो छ ।
उनीहरूले जुम्लाबाट सुर्खेतको जिपले दुई हजार र बसले १ हजार ६ सय रुपैयाँ लिन्छन् । त्यस्तै, जुम्लाबाट नेपालगन्जसम्म जिपले दुई हजार र बसले १ हजार २ सय लिन्छन् । जुम्ला–काठमाडौं बस मात्रै चल्छन, तिनले प्रतियात्रु २ हजार ८ सय ५० रुपैयाँ लिने गरेका छन् ।
कर्णाली यातायात व्यवसायी संघ, जुम्लाका अध्यक्ष मीनबहादुर थापा भाडादरमा एकरूपता नभएको स्वीर्काछन् ।
साना–ठूला सबैखाले सवारीसाधनले मनपरी भाडा असुल्ने गरेको बताउँदै उनले भने, ‘सबै यातायात व्यवसायी समिति जुम्लाभन्दा बाहिरका छन्, हामीले नियन्त्रण गर्ने अवस्था छैन ।’
कर्णाली राजमार्गमा कर्णाली, गोकर्णाली, चन्दननाथ, सनराज, बुलबुलेलगायत एक दर्जनभन्दा बढी यातायात व्यवसायी समिति सवारीसाधन चल्छन् ।
भाडादर कार्यान्वयनमा स्थानीय प्रशासनले वास्ता नगरेको कर्णाली यातायात व्यवसायी संघका अध्यक्ष थापाको भनाइ छ ।
‘यो विषय नियमन गर्न पटक–पटक सिडियोसाप र यातायात व्यवस्था कार्यालयलाई अनुरोध ग(यौँ, ध्यानै दिँदैनन्’, उनले भने । यसका लागि प्रमुख जिल्ला अधिकारीको नेतृत्वमा अनुगमन समिति हुन्छ ।
काउन्टरमा काटिन्न टिकट
यातायात व्यवसायी समितिहरूले जुम्ला बसपार्कमा काउन्टर राखेका छन् । बाटोमा पनि ठाउँ–ठाउँमा काउन्टर छन् । तर, काउन्टरमा टिकट काट्ने भने गरिएको छैन ।
मनपरी भाडा लिने गरेकाले काउन्टरमा टिकट काट्ने गरिएको छैन । यसले ट्राफिक प्रहरीलाई छल्न सजिलो हुने गरेको छ ।
उनीहरूले ट्राफिक बिटनजिक यात्रुलाई ओरालेर हिँड्न लगाउने गरेका छन् । ट्राफिक प्रहरीले पनि सामान्य जरिवाना गराएर छोड्ने गर्छन् ।
सहुलियत छैन
यातायातका साधनमा विद्यार्थी, ज्येष्ठ नागरिक र अपांगता भएका व्यक्तिलाई टिकटमा सहुलियत दिइन्छ । कर्णाली राजमार्गमा भने कसैलाई पनि भाडादरमा छुट दिने गरिएको छैन ।
जुम्लाबाट नेपालगन्ज, सुर्खेत तथा काठमाडौं यात्रा गर्दा पनि छुट नपाएको हिमा गाउँपालिकाको खलढुंगाका सूर्य अधिकारीले बताए । ‘अपांग हुँ, परिचय पत्र पनि देखाउँछु, तर कसैले छुट दिँदैनन्’, अधिकारीले भने ।
विद्यार्थीलाई पनि भाडादरमा छुट नदिने गरिएको अनेरास्ववियु जुम्लाका सचिव भरत नेपालीले बताए । ‘विद्यार्थी परिचय पत्र देखाउँदा पनि यातायात व्यवसायीले छुट दिँदैनन्’, नेपालीले भने ।
स्थानीय प्रशासनलाई पटक–पटक जानकारी गराउँदा पनि बेवास्ता गरिएको उनको आरोप छ ।
कर्णाली राजमार्गमा चल्ने सवारीसाधनमा ज्येष्ठ नागरिक, अपांग तथा महिलाका लागि सिट छुट्याइएको पनि हुँदैन । ‘उभिएर जानुपर्ने अवस्था छ’, ज्येष्ठ नागरिक संघ, जुम्लाका अध्यक्ष तीर्थराज भारतीले भने ।
