विजुली माग गर्दै महिला आन्दोलित, प्रशासनको ध्यानाकर्षण


कर्णाली पोष्ट दैनिक

जुम्ला ः विगत तीन महिना यता जुम्ला सदरमुकाम विद्युत विहिन बनेपछि यँहाका नागरिकहरु विरोधमा उत्रिएका छन् । गत मसिंर देखि सदरमुकाम खलंगा सहित चन्दननाथ नगरपालिका अन्धकारमय छ । २४ सै घण्टा लोडसेडिङको मार खेपिरहेका यहाँका नागरिकले अझै कहिलेदेखि विद्युत् बाल्न पाउने हुन्, भन्ने कुनै पत्तो छैन ।

बुधबार समावेशी महिला मानव अधिकार संजाल समितिको नेतृत्वमा जुम्लाका महिला अधिकारकर्मी सहितको टोलीले जिल्ला प्रशासनसँग विद्युत माग्दै क्याण्डल जुलुस धर्ना दिएका हुन् । उनिहरुले हातहातमा क्याण्डल बालेर जुलुस गर्दै बजार परिक्रमा गरेका थिए । अबको एक हप्ताभित्र उपभोक्तालाई नियमित विद्युत प्रवाह नभएमा यस विरुद्ध पुन युवा, विद्यार्थी, उद्योगी ब्यापारी सहितको संयुक्त आन्दोलन गर्ने चेतावानी दिइएको छ ।

साना जलविद्युत् उपभोक्ता समिति खलंगाको लापारवाही र वाहानाका कारण उपभोक्ताहरुले चरण लोडसेडिङको मार खेप्नुपरेको हो । ध्यानाकर्षण पत्र बुझ्दै प्रमुख जिल्ला अधिकारी बिष्णु पौडेलले २४ घण्टाभित्रै समिति तथा सरोकारवालासँग बैठक बसेर निष्कर्शसहित छिट्टै विद्युत प्रवाह हुने बातावरण तय गर्ने बताए । नेपालस्थित भारतीय राजदुतावासको सहयोग पाएपछि नयाँ मेसिन जडान तथा खरिदको बाहाना गर्दै समितिले विगत तीन महिना यता नत मेसिन जडान गर्न सकेको छ, नत त उपभोक्तालाई विद्युत् नै पठाउन सकेको छ । महिनौदेखि सदरमुकाम अध्यारै हुँदा जिल्लाले करोडौँको ब्यापार घाटा बेहोर्नु परेको छ । भने स्थानीयहरु टुकी, झरो तथा बैकल्पिक उर्जाको ब्यवस्था गर्न बाध्य छन् ।


अधिकारकर्मी लक्ष्मीकन्या बुढाद्धारा हस्ताक्षरित पत्रमा भनिएको छ, ‘विद्युतबारे नत समितिनै गम्भिर देखिन्छ, नत जिल्ला प्रशासनको नै ।’ विद्युत् समस्याले खलंगाका होटल व्यवसाय, व्यापारी, उद्योग कलकारखाना सबै मारमा छन् । एसइइ लगायत अन्य लोकसेवा तयारी कक्षाका लागि सदरमुकाम झरेका झण्डै १० हजार बढि विद्यार्थीको अध्ययनकार्य प्रभावित भएको छ । उपभोक्तालाई विद्युत प्रवाह गर्ने आश्वासन दिएर समितिले झारो टार्ने काम गरिरहेको अधिकाकर्मी भगवती श्रेष्ठले बताईन् ।
‘विद्युत नबालेरै बिल तिर्न बाध्य छौ, विद्युतमा आर्थिक अनियमितता बढ्दो छ’ उपभोक्ता सिता बुढाले भनिन्, ‘उपभोक्ता हकमा खेलवाड गर्न पाईदैन, प्रशासन मौन भएर नबसोस् ।’ प्रशासनलाई चरण लोडसेडिङ अन्त्यको पहल गर्न उपभोक्ताको आग्रह छ । केहि पँहुज भएका तथा उपभोक्ता समितिसँग नजिक नातागोता भएकाहरुले भिआइपी लाईन लिदाँ चरण लोडसेडिङ बढेको भन्दै पत्र मार्फत लाईन काट्न आग्रह गरिएको छ ।

तपाईको प्रतिक्रिया