जुम्लाको हिमा गाउँपालिकाले प्रत्येक घरधुरीलाई ३० केजी चामल र २५ केजी नुन वितरण थालेको छ ।
लकडाउनका वेला सबैको घरमा समस्या भएको भन्दै यस्तो व्यवस्था गरेको गाउँपालिका अध्यक्ष रजबहादुर शाहीले बताए ।
गाउँपालिकाको निर्णयअनुसार पहिलो चरणमा चामल र नुन वितरण गर्दै आएको उनले बताए ।
गाउँपालिकाको वडा नम्बर १, २, ३ र ५ का एक हजार ५ सय ६७ घरधुरीलाई बुधबार घरदैलोमै पुगेर राहत वितरण गरिएको उनले बताए ।
गाउँपालिका भरी दुई हजार तीन सय ३५ घरधुरी रहेकामध्ये एक सय ५० घरधुरी अतिविपन्न भएकाले उनीहरूलाई थप राहतको व्यवस्था गर्ने अध्यक्ष शाहीले बताए ।
लकडाउनको समयमा खाद्यसंकट हुन सक्ने भन्दै जिल्लाको हिमा गाउँपालिकाले खाद्य बैंक स्थापना गरेको छ ।
गाउँपालिकाले नेपाल खाद्य संस्थान सुर्खेतबाट चामल खरिद गरी खाद्य बैंक सुरु गरेको हो ।
गाउँपालिका अध्यक्ष शाहीका अनुसार चामल, दाल, नुन, तेल सबै एकै ठाउँमा जम्मा गरी खाद्यसंकटको समयमा वितरण गरिनेछ ।
अतिविपन्नलाई पहिलो प्राथमिकता राख्दै आवश्यक भएका स्थानीय व्यक्तिलाई फुड बैंकबाट खाद्यान्न उपलब्ध गराउने तयारी गरिएको उनले बताए ।
गाउँपालिकाभरिका सबै घरधुरीलाई ४७ लाख रुपैयाँबराबरको चामल खरिद गरेको प्रमुख प्रशासकीय अधिकृत टोपबहादुर बुढाले बताए ।
उनले सुर्खेतस्थित खाद्य संस्थानको कार्यालयबाट सात हजार क्विन्टल चालम आयात गरिसकेकाे बताए ।
पालिकाभरिका दुई हजार तीन सय ३५ घरधुरीलाई ३० केजी चामल, २५ केजी नुन, दाललगायतका खाद्यान्न उपलब्ध गराउन खाद्य बैंकमा जम्मा गरेको उनले बताए ।
