काेराेना निकाे भएका युवक भन्छन्– संक्रमण देखिए पनि डराउनुपर्दैन


धनगढी : काेराेना संक्रमण निकाे भएर सेती प्रादेशिक अस्पतालबाट आइतबार डिस्चार्ज भएर घर जान लागेका कैलालीको लम्कीचुहा नगरपालिकाका २१ वर्षीय राज विक राेग लाग्दैमा डराउन नहुने बताउँछन् । अस्पतालबाट डिस्चार्ज भएपछि खुसी देखिएका उनले संक्रमण देखिए पनि आफूलाई डर नलागेको बताए । उनले भने,  ‘अरूलाई पनि कोरोना संक्रमण देखिँदैमा हिम्मत नहार्न आग्रह गर्छु ।’

उनी साढे दुई साता लामो उपचारपछि घर फर्केका हुन् । लगातार दुईपटक परीक्षण गर्दा कोरोना संक्रमण नभएको पुष्टि भएपछि उनलाई डिस्चार्ज गरिएको सेती प्रादेशिक अस्पतालले जनाएको छ ।

कोरोनाको संक्रमणलाई जितेर फर्कन लागेका विकलाई उनको उपचारमा संलग्न चिकित्सक र प्रदेशका सामाजिक विकासमन्त्री कृष्णराज सुवेदीले पुष्पगुच्छा दिएर बिदाइ गरे । भारतबाट फर्केर १२ चैतमा घर पुगेका उनलाई २२ चैतमा कोरोना रहेको पुष्टि भएको थियो ।

घर फर्केपछि क्वारेन्टाइनमा बसेका विकका परिवारका सदस्यलाई भने कोरोना देखिएको छैन । लगातार दुईपटक थ्रोट स्वाबको जाँच गर्दा रिपोर्ट नेगेटिभ आएपछि विकलाई घर पठाइएको सेती प्रादेशिक अस्पतालको आकस्मिक विभाग प्रमुख डाक्टर जगदीशप्रसाद जोशीले बताए । विकमा कोरोनाको कुनै लक्षण देखिएको थिएन ।

सेतीमा उनीसहित पाँचजना संक्रमितको उपचार भइरहेको थियो । अन्य चारजनाको भने उपचार जारी छ । संक्रमित चारैजनाको अवस्था सामान्य रहेको डाक्टर जोशीले बताए ।

https://www.nayapatrikadaily.com/news-details/41606/2020-04-19

तपाईको प्रतिक्रिया