सागर परियार ।
जुम्लामा आर्थिक वर्ष २०७७÷०७८ को राजश्व संकलन लक्ष्य भन्दा बढी भएको छ । कोरोना कहरका बीच पनि राजश्व संकलन उत्साहजनक रुपमा भएको छ । आन्तरिक राजश्व कार्यालय जुम्लाले विभिन्न शिर्षकमा आव २०७७÷०७८ मा ३२ करोड ९८ लाख ९८ हजार अर्थात १२९ प्रतिशत राजश्व संकलन गरेको हो ।
जुम्लामा लक्ष्य भन्दा ७ करोड अर्थात २९ प्रतिशत बढी राजश्व संकलन भएको छ । यो रेर्कड धेरै आर्थिक वर्षयताकै सबैभन्दा बढी राजश्व संकलन हो ।
आन्तरिक राजश्व कार्यालय जुम्लाका कर अधिकृत यूवराज बस्नेतले भन्नुभयो,“आव २०७७÷०७८ वार्षिक राजश्व संकलनका लक्ष्य २५ करोड ५४ लाख ४३ हजार थियो । कोरोनाले लक्ष्य नभेटिने चिन्तामा थियौ । तर तेस्रो चौमासिक यता राजश्व संकलन उल्लेखीय रुपमा बृद्धि भई लक्ष्य भन्दा २९ प्रतिशत अर्थात ७ करोड बढी राजश्व उठेको छ ।”
आन्तरिक कर परिक्षण तथा अनुसन्धानलाई बढाउँदा र करको दायरालाई विस्तार संगै गाउँगाउँमा करशिक्षा दिएकै कारण लक्ष्यभन्दा बढी राजश्व संकलन भएको कर अधिकृत बस्नेतको भनाई छ ।
सरकारी ठेक्का पठ्ठाको मुल्यअभिबृद्धि कर भुक्तानी गर्दा भएको भएको मुअ कर गएको जेठ १५ सम्म ५० प्रतिशत र जेठ १५ पछि ३० प्रतिशत रकम दाखिला गर्दा राजश्व संकलन ह्वात्तै बढेको कार्यालयले जनाएको छ ।
साथै, बितेको आर्थिक वर्षमा जुम्लामा २ हजार १ सय ५१ जना करदाता थपिएका छन् । जसमा भ्याटतर्फ १ सय ८६ जना, आयकरतर्फ १८ सय ६१ ज्ना र अन्तशुल्क तर्फ २ सय ३१ गरी २ हजार १ सय ५१ ज्ना थपिएका हुन् ।
आन्तरिक राजश्व कार्यालयको तथ्यांक अनुसार हाल सम्म जुम्लामा कुल ११ हजार ८ सय ८३ जना करदाता रहेका छनु । जसमा सबैभन्दा बढी आयकरमा ११ हजार २५ जना छन् भने, भ्याटमा १ हजार २ सय ७५ र अन्तशुल्कमा ४ सय ८० जना रहेका छन् ।
कुन शिर्षकबाट कति उठ्यो राजश्व ?
आन्तरिक राजश्व कार्यालय जुम्लाले विभिन्न २८ वटा शिर्षकबाट राजश्व संकलन गर्दै आएको छ । जसमा सबैभन्दा बढी परामर्श तथा ठेक्का पट्टा शिर्षकबाट ११ करोड २४ लाख ९ हजार राजश्व संकलन भएको छ ।
त्यस्तै,पारिश्रमिकमा आधारित सामाजिक सुरक्षा करबाट २ करोड ८२ लाख ७६ हजार,अन्तशुल्क मदिराबाट ५९ लाख ४७ हजार ७ सय, वस्तु विक्री तथा वितरण बापत२ करोड ९८ लाख ५१ हजार २ सय,पारिश्रमिक कर ६ करोड ९२ लाख ३३ हजार ८ सय राजश्व उठेको छ ।
साथै, प्राईभेट लिमिटेड कम्पन्नीहरुबाट ३८ लाख ६९ हजार सम्पत्ती बहाल तथा पट्टा बापत आयमा लाग्ने कर ६२ लाख ५६ हजार ३ सय ब्याजमा लाग्ने कर २७ लाख ९९ हजार ५ सय राजश्व संकलन भएको छ ।
त्यस्तै, एकलौटीफर्म तथा व्यक्तिगत आयमा लाग्ने कर६ करोड ४३ लाख ४१ हजार ४ सय,पुजीगत लाभकर बापत ४ लाख ६० हजार लगायतका २८ वटा शिर्षक गरी लक्ष्यभन्दा २९ प्रतिशतले बढेर ३२ करोड ९८ लाख ९८ हजार राजश्व संकलन भएको कर अधिकृत यूवराज बस्नेतले बताउनुभयो ।
